كتبت : سمية الجمل
تعتبر الاعلامية والإذاعية نور الصباح بنوتة صغيرة بالضفاير عندها احلام كتيرة بس في الهوا طاير
حلمها تبقى مطربة مذيعة صحفية حبها للخير ساكن في قلبها الصغير لكن محبوسة في قفص التقاليد الدافن
بقى عمرها 17سنة واتقدم لها فارس الاحلام وافقت وكمان كملت دراستها واتخرجت من كلية الاداب قسم اجتماع جامعة الزقازيق وطبعا كان نفسها تدخل كلية اعلام لكن فرقت في درجةونص في مجموع اللغات اتجوزت وخلفت واطحنت في رحايا الحياة بس كانت دائما تاخد الامور ببساطة هاقلهالكم كدة على بلاطة كانت مسلمة امورها للخلقها وسافرت ووقفت جنب زوجها كمل دراسته وحقق احلامه عشان هي كانت زوجته وامه وكانت السند والدعم له طول عمره اتحدت الغربة وطلعت اشتغلت وخلفت ثلاث بنات وولدين وكانوا بالنسبة لها الحب والحنين وكملت مشوارها ووقفت مع جوزها لحد اما وصل لبر الامان وبقى من مشاهير الخليج في شغله ماهو مش جديد عليها كانت السند لامها وابيها
رجعت بلدها عشان ولادها والجامعة اللي فاتحة بابها رجعت بلدها لوحدها وكانها بيبي صغير بيتعلم المشي خايفة تمشي تقع بس اتعلمت المشي واتحدت الخوف بدأت تسأل نفسها خلاص كدة خلاص كدة هي دي الحياة هي دي الرسالة الدنيا كلها بتتحرك وانت هاتقفي عند تربية الاولاد وبس
لا لا لا مش هوا دا مش هوا دا حلمها شافت صدمات كتير واتخبطت على راسها كتير فحبت تاني ترجع تحقق حلمها ماهي البنوتة لسة اللمعة في عيونها والنشاط والحيوية عنوانها والعطاء المستمر هو املها
اتدربت على ايد استاذها يوسف الدالي وفي نفس الوقت درست تنمية بشرية في المركز الكندي فاتعينت مذيعة في تسعينات اف ام والحمد لله اخدت المركز الاول في ماستر التنمية البشرية وعينوها مدربة تنمية بشرية في المركز الكندي ومش بس كدة بقت استشاري نفسي واسري معتمدة من عين شمس وحاليا بتدرس لايف كوتش ومش بس كدة هي مكملة مكملة وعيونها على النجاح والتطوير متأملة هي دي الاذاعيه نور الصباح
