كتب: الإعلامي/ روبير الزردقي
لكى تعرف سبب الحرب اللي بتدور دلوقتي بين روسيا وأوكرانيا لازم نرجع بالزمن سنين كتير ورا لحد ما نوصل لجذور المشكلة نفسها.
والأسئلة اللي لازم تدور في عقلك هل دي بداية حرب عالمية تالتة ممكن تغير شكل العالم؟ ولا دي النهاية وخلاص العالم بينهار؟!
بص يا سيدي يوم 25 ديسمبر سنة 1991م الرئيس الأخير للإتحاد السوفييتي ميخائيل جورباتشوف خرج في خطاب رسمي في التليفزيون وأعلن استقالته وكلامه كان واضح وصريح معناه إن الإتحاد السوفيتي خلاص بيتفكك وقال إنه بيسلم كل سلطاته الدستورية وكمان سلطته على الأسلحة النووية اللي في روسيا للرئيس الروسي بوريس يلتسن
والإتحاد السوفيتي دا عبارة عن 15 دولة وكان له هيمنة وقوة كبيرة جدًا وكان من أقوى الكيانات الدولية في العالم وكل الدول كانت بتهاب منه.
بعد خطاب غورباتشوف مشي وساب الكرملين وتاني يوم الصبح نزل علم الإتحاد واترفع مكانه علم روسيا ودا لأنها أقوى دولة في الإتحاد.
لازم تعرف إن قبل الخطاب دا فيه كام شهر كدا مروا على الإتحاد السوفيتي كانوا مذبذبين فكل الدول تقريبًا بدأت تنشق وتعلن نفسها دولة مستقلة بما فيهم روسيا فتفكك الإتحاد السوفيتي حصل قبل الخطاب ولكن الخطاب أكده ومن هنا انتهى الإتحاد السوفيتي تمامًا.
كمان كان فيه عداء مستمر بين الإتحاد السوفيتي وحلف الناتو اللي يعد أكبر تحالف عسكري في العالم ومكون من 30 دولة من ضمنهم أمريكا وقانونهم الأول والأخير هو إنهم يدافعوا عن أي عداء عسكري يقع على أي دولة منهم يعني بالبلدي اللي يقرب من دولة فيهم الدول كلها ترد عليه الهجوم والعداء دا كان بشكل خاص بين أمريكا وروسيا.
وأساس حلف الناتو واللي قام عليه هو خوفهم من الإتحاد السوفييتي لأن قوته كانت بتزيد كل يوم وعلشان أوروبا متصحاش الصبح تلاقي الإتحاد السوفييتي بيعلن الحرب على أي دولة وبيحتلها بقوته بسهولة قرروا يعملوا حلف الناتو ودا إداهم قوة في إنهم يتصدوا لأي ضربة تتوجه لهم.
في الوقت دا كان فيه حاجة كدا اسمها الحرب الباردة ودي كانت بين الكيانين اللي هو احنا في حالة حرب بس مفيش تعدي عسكري قوي بيتم واحنا أعداء وعارفين إننا أعداء وكل دولة مستنية غلطة من الدولة التانية علشان تتحرك بجيشها بس مفيش حد بيتحرك يعني في حالة حرب بس مفيش حرب وكل كيان من الناحية بتاعته كان بيحاول يسعى إنه يكون أقوى عسكريًا وإقتصاديًا وغيره.
الحرب الباردة دي انتهت مع تفكك الإتحاد السوفيتي بسبب تفكك الدول نفسه والعداء دا كان بين منظمة حلف الناتو وحلف وارسو اللي كان بيضم الإتحاد السوفييتي وسبع دول تانيين وحلف وارسو دا قام في الأساس استعداد لأي تعدي ممكن يقوم بيه حلف الناتو.
ولو دخلنا في قصة العداء فالموضوع كبير جدًا المهم إن حصل تفكك لكل الدول دي واللي لازم تعرفه إن بعد تفكك الإتحاد السوفييتي فيه دولتين راحوا إنضموا لحلف الناتو وهمَ إستونيا وليتوانيا وطبعًا دا تسبب في غضب كبير لروسيا ولكن الدولتين عرفوا يسايسوا أمورهم بين روسيا ودول أوروبا.
برضه كان في عداء شكلي بين روسيا ودول أوروبا ومعنى إن دولة كانت حليفة لروسيا تقرر الإنضمام لحلف الناتو دا قرار ممكن يتسبب في إن روسيا تتصرف تصرف عدائي كبير تجاه الدولة دي حتى لو فيه ارتباطات إقتصادية بين روسيا وأوروبا كل دي شكليات.
يعني مثلًا سنة 2008م جورجيا صرحت إنها هتنضم لحلف الناتو بعدها بأيام روسيا دخلت بجيشها على جورجيا واحتلتها فتراجعت جورجيا عن قرارها.
فبدأ يحصل قلق لكل الدول اللي كانوا أعضاء في الإتحاد السوفيتي وعرفوا إن روسيا بتمنعهم من أي انضمام للحلف وإن الإنضمام معناه إعلان الحرب على روسيا نفسها.
كمان روسيا بتمتلك تاني أقوى جيش في العالم بعد الولايات المتحدة الأمريكية وعندها 900 ألف عسكري روسي وعندها ميزانية إقتصادية قوية جدًا وأسلحة بحرية وجوية وبرية من أقوى الأسلحة في العالم وكمان عندها أسلحة نووية فكون إن دولة تعارضها أو تدخل معاها في حرب الموضوع محسوم من البداية.
كمان روسيا مبتفكرش كتير قبل دخولها حرب كانت موجودة في الحرب العالمية الأولى وكمان الحرب العالمية التانية ومعندهاش أي مشكلة تدخل حرب عالمية تالتة وتاريخهم كله مليان حروب.
في وقتنا الحالي روسيا بتمتلك كمية كبيرة من الغاز الطبيعي وبتصدر أكتر من نص الكمية اللي بتمتلكها سنويًا لأوروبا وخطوط الغاز بتاعتهم بتعدي من أوكرانيا ودا سبب كبير يخلي روسيا تجبر أوكرانيا إنها تبقى تحت سيادتهم وعلشان كدا أي تحرك من أوكرانيا للانضمام لحلف الناتو هيكون الرد عليه قوي جدًا وانضمام أوكرانيا لحلف الناتو معناه شبه سيطرة أمريكا عليهم فبالتالي هتبقى ضربت روسيا في أهم حاجة بتمتلكها وهي الغاز الطبيعي.
من وقت طويل جدًا وروسيا حريصة على إن ميبقاش فيه أي صلة بين أوكرانيا والإتحاد الأوروبي.
سنة 2014م أوكرانيا كانت هتوقع إتفاقية تجارية بينها وبين الإتحاد الأوروبي وفجأة الإتفاقية دي تقف بدون أي أسباب وبعدها بتتم الإتفاقية بس بين الإتحاد الأوروبي وروسيا ودا معناه إن روسيا بتحاول بكل الطرق ميبقاش فيه أي احتكاك بين أوكرانيا وأوروبا غير إن بوتين نفسه خرج في تصريحات كتير ليه وقال إن حتى لو الإتحاد السوفييتي اتفكك فإن أوكرانيا وروسيا يعتبروا دولة واحدة.
بسبب الصفقة وبسبب موافقة رئيس أوكرانيا لقرارات بوتن خرجت مظاهرات في أوكرانيا بتطالب باستقلالها بعيد عن روسيا كأنهم محتلين بالظبط والمظاهرات دي كمان كانت بتناشد بعزل رئيس أوكرانيا اللي خاف وهرب فورًا على موسكو فالشعب جاب رئيس تاني يمسك أوكرانيا.
الرئيس الروسي فلاديمير بوتين معداش موقف المظاهرات دا على خير ودخل وسيطر على منطقة شبة جزيرة القرم اللي تعتبر من أهم المناطق في أوكرانيا وغنية بثروات طبيعية.
وبسبب سيطرة روسيا على جزيرة القرم اقتصادها زاد بشكل ملحوظ جدًا وثرواتها زادت ومقدرتش أوكرانيا ترجع الجزيرة تاني وفضل الوضع بالشكل دا لحد وقتنا هذا.
سنة 2022م من حوالي 3 أسابيع تقريبًا خرجت مظاهرات تانية في أوكرانيا بترفض سيطرة روسيا عليها وبيطالبوا بانضمامهم لحلف الناتو وبدأت تهديدات بوتين إن أوكرانيا لو فكرت في الانضمام لحلف الناتو هيعلن الحرب عليها وهيدخل يحتلها ولكن حلف الناتو سخن أوكرانيا وبعت لها أسلحة علشان تواجه بيها روسيا، ف بوتين عاند أكتر وقرر إنه يدخل أوكرانيا فنشر 130 ألف جندي على الحدود الأوكرانيا وهدد بإنه في أي لحظة هيعلن الحرب.
خرج الرئيس الأمريكي جو بايدن بيحذر من إن فيه حرب هتقوم بين روسيا وأوكرانيا وناشد المواطنين الأمريكيين إنهم يخرجوا فورًا من أوكرانيا وإنه غير مسئول عن أي مواطن كسول هيقرر إنه ميرجش وطنه وكذلك بريطانيا طالبت شعبها بالرحيل عن أوكرانيا وروسيا وألمانيا واليابان ودول كتير بتطلب من مواطنيها يخرجوا من أوكرانيا.
بعدها البرلمان الروسي طلب من بوتين إنه يوقع على إتفاقية إستقلال الجمهوريتين اللي موجودين في أوكرانيا دونتسك ولوهانسك.
ولازم تعرف حاجة مهمة جدًا إن كان فيه قوات اسمها الإنفصالية مدعومة من روسيا كانت بتحارب القوات الأوكرانية وحصل معاهدة بين بوتين ورئيس أوكرانيا على وقف المناوشات دي ولكن استقلال الجمهوريتين معناه وقف المعاهدة ورجوع القوات الإنفصالية في ضرب أوكرانيا وبكدا يزيد الضغط على أوكرانيا وتقع بسهولة.
والقوات الإنفصالية دي بتكون حركة سياسية شعبية بتطالب بالانفصال والاستقلال عن الدولة اللي موجودة فيها ولذلك القوات الانفصالية في أوكرانيا موالين لروسيا.
لحد من كام يوم الأوضاع كانت إن أوروبا بتساعد أوكرانيا وبتمدها بأسلحة وروسيا داخلة على أوكرانيا
والقوات الإنفصالية ضربت بالفعل بعض خطوط غاز في شرق أوكرانيا على الحدود الروسية وخرجت روسيا وقالت إنهم بيضربونا علشان يعني لما يبدأ الحرب يكون عنده حجة.
وأمريكا كمان بعتت 3000 جندي لبولندا بحجة تأمين الجناح الشرقي لحلف الناتو وعلشان تهدي الوضع.
خرج رئيس دولة بيلاروسيا اللي هو بيدعم بوتين وقال إنهم جاهزين لأي حرب وأي هجوم هيفكر يقوم بيه الغرب هيردوا عليهم بأسلحة نووية.
وخرج بعده بوتين وأعلن استقلال جمهوريتين دونتسك ولوهانسك وقال خطاب فيما معناه إن قرار الحرب لا بد منه وإن أمريكا بتستغل أوكرانيا علشان توقع روسيا.
النهاردا، 24-2-2022م خرج الرئيس الروسي فلادير بوتين في خطاب رسمي وأعلن الحرب على أوكرانيا وقال إن الجيش بالفعل بدأ يتحرك وعبر حدود أوكرانيا وإنهم شنوا كذا إنفجار عسكري في أوكرانيا وقال في حجة هجومه إنه رايح يدعم القوات الإنفصالية اللي بيطلبوا دعمه وقالوا إن الجيش الأوكراني بيهاجمهم وهمه يعتبروا دلوقتي روسيين.
كمان في نبرة كلامه كان باين إن أي تدخل من أي دولة تانية لدعم أوكرانيا هتبقى عدوة له ومش هيسكت وبكدا يا عزيزي شكلنا داخلين على حرب عالمية تالتة ونتائج الحروب العالمية بتكون كارثية على كل دول العالم.
اللي بيحصل دلوقتي إن روسيا بتاكل أوكرانيا حرفيًا.
شنت كذا هجوم عسكري في شرق أوكرانيا والمدن الساحلية جنب جزيرة القرم وضربت مدينة خاركيف وفيه 4 انفجارات دوى صوتهم في كراماتورسك ودخلوا مدينة أوديسا على البحر الأسود وحصل انفجارات في ماريبول.
وكالة إنترفاكس بتقول إن فيه هجمات صاروخية خرجت من الجيش الروسي بتستهدف المنشآت العسكرية في جميع أنحاء أوكرانيا.
القوات الروسية زحفت في مدينتين أوديسا وماريوبول ضربت مطار لوريسبيل في العاصمة كييف وتم إخلاء المطار من المدنيين والموظفين وقفلوه.
اتقفل المجال الجوي للطيارات تمامًا.
وسائل إعلامية روسية نقلت عن وزارة الدفاع الروسي إن الضربات الصاروخية أو المدفعية بتستهدف البنية التحتية للجيش الأوكراني بأسلحة عالية الدقة ومفيش أي نية لمهاجمة مدنيين أو قتل مواطنين أوكرانيين.
لازم تعرف إن أي حرب في أي دولة بتقوم بتأثر إقتصاديًا على أجزاء من العالم وممكن تكون سبب في إن إقتصاد العالم كله يقع.
الدول مكملة لبعض يعني في ترابط إقتصادي بين كل الدول تقريبًا أنا باخد منك قمح إنت بتاخد سكر باخد منك غاز بتاخد مني قطن وهكذا كلها مصالح مشتركة ولما تقوم حرب في دولة طبيعي مبتبقاش عندها رفاهية الإستيراد والتصدير وبتصب إنشغالها كله على الحرب دا غير إن الشعب نفسه بيبدأ في التراجع عن العمل زي إن مزارع يهرب من مزرعته فيقل إنتاج البلد أو إن الحرب نفسها معالمها تطول محاصيل أو مصانع أو غيره فبيبدأ التأثر العالمي ودا ممكن يتسبب في مجاعة أو انهيار إقتصادي لبعض الدول
الأول على الدول اللي بتحارب
وبعدها بيطول دول مش مشتركة أصلًا في الحرب وممكن احنا كدول عربية نتأثر وبشكل كبير، فالموضوع مرعب وممكن يتسبب في كوارث في الأيام الجاية لو متلمش بأقل خساير.
يعني مصر مثلًا تقريبًا كل القمح اللي بتستورده بيكون من أوكرانيا لأن سعرها رخيص فلك أن تتخيل إن الدولة اللي معتمد عليها اعتمادك الكلي في القمح دخلت حرب فإنت هتتوجه لبلد تانية سعرها غالي وكمان هترفع عليك السعر استغلال، ولو قدرت توفر اللي إنت بتحتاجه فالأسعار هنا هتزيد وقيس بقى على دا كل السلع.
